跟住我地成班一齊整沙律同咖哩醬, 將材料放埋一齊, 打碎就搞掂喇!
最後整埋甜品~
我地大概十二點多就食完, 搭船去Museum of Siam, 去到發現佢維修緊...當時落緊大雨 (曼谷天氣真係變幻莫測), 所以我地決定唔去其他景點, 直接去JJ market, 可惜塞左好耐車..哩到嘅手信平過Asiatique好多, 買完就返酒店!
好彩夜晚停左雨, 我地先可以喺半島嘅河畔泰國餐廳THIPTARA Thai 食晚飯..
*餐廳冇冷氣, 所以夜晚先開門, 另外只得68個位, 記得先預訂!
由接待, 點餐, 送餐, 酙水, 都係同一個侍應招呼我地, 而且佢地講解好仔細, 有問必答, 亦介紹唔同嘅菜式比我地..單點比set menu化算, 我地叫左1個前菜, 2個主菜同1個甜品~
免費嘅開胃菜, 炸蝦餅配甜酸汁
MIANG KHAM THB340
哩個前菜係泰國皇室菜, 用檳榔葉將烤椰子, 青檸, 薑, 蔥頭, 花生同蝦乾包住, 點羅望子醬食...層次好豐富, 係幾特別嘅!
POO NIM THOD KRAPRAO GROB THB540
招牌菜之一, 酥炸軟殼蟹配大蒜, 辣椒同九層塔, 完全唔油膩, 令我食到停唔到口!
PLA KA PONG NEUNG MA NAO THB540
另一道招牌菜係酥炸鱈魚, 但我地覺得如果2道主菜都係炸會太熱氣, 所以聽侍應嘅介紹點鱸魚..佢個汁係辣檸檬汁, 岩晒鍾意食辣但又唔鍾意太重口味嘅我! 鱸魚鮮甜又帶點辛辣, 好味!
BUO LOY SAMSI THB280
食得多芒果糯米飯, 今次試其他甜品, 椰汁丸子, 有班蘭, 南瓜同紅蘿蔔三種味, 甜度適中, 為晚餐寫上完滿嘅句號! 期待下次再黎睇其他菜式!
食完飯我地就去Ruen Nuad做最後一次按摩, 按摩店走簡約風, 價錢亦算實惠, 精油按摩1小時THB700, 2小時THB1,150..喺門口聽到喺本地工作嘅外國人話佢地幫襯左幾年, 可見哩度嘅按摩師技術好! 而我就舒服到訓著左, 按完之後覺得身體放鬆晒, 果晚訓得好好!
Day 7
因為要搭3:35pm機返香港, 所以最後一日決定留喺酒店..一起身望住個河景, 實在唔想咁快返香港開始新婚生活!
半島嘅泳池係靚嘅, 可惜天色灰暗, 臨走時先有藍天.. :[
check out之後我地搭的士去食最後一餐: 水門雞飯...搭的士絶對係成個旅程最錯嘅決定, 因為曼谷市區塞食塞得太恐怖, 的士司機仲兜我地路...最後我地用左個半鐘先去到 T.T
我地揀左粉紅色制服果間Kai Ton Pathumwan, 係老字號, 門口超多人, 但我地已經冇時間, 所以只可以買外賣...雞飯THB40一盒, 好快就攞得..跟住我地搭tuk tuk 15分鐘就返到酒店, 再轉的士去機場..
喺的士上終於食到雞飯, 簡單但油飯香, 雞嫩, 唔怪得之餐廳大排長龍!
哩餐飯為我嘅程劃上句號, 泰國蜜月過得好輕鬆又滿足, 多謝大家收看!
Follow me on facebook for more sharing: Chill Out · Chow Down with Jen
留言列表
