泰國麗貝島曼谷7日蜜月遊 - 準備篇 @ 珍妮的部落格

好多人鍾意去歐洲度蜜月, 但我就覺得咁辛苦搞完個婚禮應該好好休息一下, 唔想諗太多行程, 所以一早已經決定去有"陽光與海灘"嘅地方!

點解對麗貝島有興趣?

上年睇新假期時比佢嘅標題"平版馬代"同好夢幻嘅沙灘封面圖吸引左, 即刻對麗貝島有興趣!

再睇埋介紹, 不得了! 又平又唔多人, 有世外桃園嘅感覺! 下圖就係其中一個沙灘, 不過要4月旱季時先會有哩個夢幻沙丘景><

photo from 新假期official website

原來麗貝島係泰國最南端嘅小島, 面積只有5平方公里, 環島慢跑一圈只需1小時! 因為交通唔方便, 所以旅客同污染都比較少! 島上有3個沙灘, 旅遊發展唔算發達, 只係得1條步行街, 但都有唔少餐廳, 按摩舖, 浮潛/潛水day tour旅行社, 消費唔算高, 所以網上遊記都對麗貝島讚不絕口!

點樣去麗貝島?

1. 浮羅交怡搭快艇 (1.5小時)

哩條係最快嘅路線, 不過快艇只係旺季時有(11月-5月), 我去嘅時候係9月就冇得搭..

2. 喀比搭mini van再轉快艇 (共5.5小時)

哩條路線適合想一次過去泰南幾個地方嘅朋友

3. 曼谷搭內陸機, 再轉mini van同快艇 (共6.5小時)

大部分網友(包括我)都會揀哩條路線, 因為去曼谷嘅機比喀比多, 又可以順便去曼谷玩! AirAsia 亦都推出左一條龍服務, 我就一次過喺AirAsia官網訂左來回飛機、mini van同快艇嘅套票, 好方便, 飛機delay都唔使驚!

最終行程決定

雖然麗貝島交通比布吉、蘇梅等泰國島嶼唔方便, 但我同老公都覺得用咁多交通時間去享受靚景係值得嘅, 所以就決定左honeymoon去5日麗貝島 (包括來回13小時交通)再加2日曼谷!

麗貝島好細, 而且淡季有部分酒店唔開, 所以我當時嘅酒店選擇唔多...原本最吸引我嘅係有pool villa嘅Serendipity Resort, 可惜維修緊冇開 T^T

photos from Serendipity Resort official website

難得去到小島, 我嘅要求只有一個, 就係喺房要望到沙灘! 望到沙灘嘅房型有分Beach View (一樓或二樓)同Beachfront(地下)...Beach View房香港都有啦, 所以我就決定要搵Beachfront房!

根據哩個要求同訂房網站嘅網上評價, 我最後揀左Mali Resort Pattaya Beach, 雖然冇Serendipity咁豪華, 但就多一份自然簡樸感覺! 我book嘅房型係Balinese Luxury Beachfront, 係全間resort最貴嘅房型, 但都唔使$900一晚! 一訓醒就望到沙灘真係好爽, 完全冇後悔揀左Mali!