上回: 泰國麗貝曼谷7日蜜月遊 - 準備篇
今次會先講Day 0-Day 2行程!
麗貝島行程:
Day 0: 香港機場→曼谷廊曼機場
Day 1: 曼谷廊曼機場→合艾機場→Pakbara Pier→麗貝島→按摩
Day 2: 浮潛→按摩→睇日落→燭光晚餐
Day 3: 睇日出→按摩→睇日落
Day 4: 潛水→瑜伽
Day 5: 麗貝島→Pakbara Pier→合艾機場→曼谷廊曼機場
Day 0
結婚之後果日還完衫就去機場搭AirAsia 7:50pm班機去曼谷廊曼機場, 今次搭夜機去曼谷係為左駁第二朝6:40am嘅內陸機去麗貝島, 因為搭遲一班就要傍晚先去到麗貝島!
Air Asia係廉航, 唔包飛機餐, 所以我地check in後先去食大力水手炸雞, 一個炸雞薯條餐$78唔算平但炸雞外脆內軟好好味, 結完婚放肆食係開心嘅!
搭左幾次AirAsia都冇delay, 今次亦喺9:40pm準時到達曼谷(泰國比香港慢1個鐘), 一出機場就見到我地住嘅Amari Don Muang Airport Bangkok Hotel, 真係好方便聽朝搭早機嘅我地瞓一晚!
Day 1
第二朝我地五點幾去到機場, 仲睇到日出, 開始好期待蜜月旅行!
去到合艾都只係8am, 一出機場就有Air Asia嘅職員點名, 食啲野之後就搭9am嘅小巴去Pak Bara碼頭..
我第一次去泰國, 望向窗口覺得所有野都好新鮮, 例如第一次見咁多人企一架車! 所以哩個零鐘車程好快就過!
碼頭附近有幾間舖頭賣防曬、泳衣、防水袋等用品, 不過麗貝島都有幾間雜貨舖, 帶漏左都唔使驚!
準時11:30am上快艇, 大概三十幾人坐滿晒! 本身諗住我同沙巴嘅快艇差唔多, 但點知chok好多, 全程都好似海盜船咁! 船程要個半鐘, 所以都有啲難捱, 仲有唔少人暈同嘔, 而我老公就照打機(汗)..
建議會暈船浪嘅人上快艇前食藥, 或者peak season (11-5月)先黎, 因為到時會冇咁大浪!
成程船其實都冇乜風景睇, 只係間中有啲無人島..
熬完個半鐘後終於到麗貝島, 水清沙幼美景映入眼簾, 而且即使9月係雨季, 天氣都好好!
一落船就見到Mali Resort酒店職員拎住我地嘅名牌, 等埋其他Mali住客就開車去酒店, 需時五分鐘..
"Welcome to Paradise"
職員首先帶我地去bar, 送上welcome drink同 check-in, 之後就帶我地去之後四晚住嘅小屋~
之前提過我訂嘅房型係beachfront, 所以係超近沙灘!
房間同網上照片差唔多, 望到沙灘 :) 裝修簡約, 乾淨企理, 不過沖涼地方喺戶外, 如果落雨都幾麻煩, 而且有蚊!
放好行李之後我地就沿住pattaya beach行大概十分鐘去walking street食午飯
去到發現好多舖頭同餐廳淡季都冇開, 而且條街都冇乜人, 有少少似荒島..
求其入左一間, 之後睇返先知原來網上評價都幾好!
評分: 味道5 | 環境3 | 價錢4
我地叫左好大嘅椰青, 好香脆嘅香蕉班戟同埋惹味魚餅..作為麗貝島第一餐我好滿意!
之後我地喺walking street求其搵左一間旅行社(Daya Travel)報聽日嘅浮潛團, 淡季一日得一團而且去嘅島會冇咁遠, 盛惠每人THB550~淡季黎係少啲選擇架喇...
舟車勞頓完有啲攰, 就決定去按摩..基本上麗貝島酒店同walking street按摩舖基本按摩價錢都係THB300一個鐘, 我覺得酒店環境好啲所以返左Mali Resorts按..
Mali嘅按摩地方喺沙灘上面, 只係得兩位按摩師, 所以最好提前預約!
佢只係得三款按摩: Thai Massage, Oil Massage同Foot Massage..我揀左THB300 (~HKD75)嘅Thai Massage, 我同老公覺得兩位按摩師手勢都好好, 舒服到訓著左!
之後喺酒店吊床休息一下..
原本一早book左燭光晚餐, 點知餐廳負責人唔記得 (之後亦喺其他地方發現哩個島嘅人比較善忘/唔上心..), 所以我地改為之後一日先食..
我地行返去walking street搵餐廳, 見到有live music就揀左佢...
評分: 味道3 | 環境4 | 價錢4
點左咖哩炒飯, 奄列同炒雜菜..調味有啲重, 好在環境搭救, 樂隊玩嘅都係英文jazz歌, 一啲都唔馬虎!
因為第二朝要9am去浮潛, 所以食完飯我地都快啲返酒店休息..沿Pattaya beach行返酒店時見到有間餐廳有火把表演..之前睇旅遊blog見到好多泰國地方都有, 估唔到麗貝島都有得睇!
Day 2
第二朝起身一打開窗簾就見到沙灘, 即刻唔賴床, 行幾步出去沙灘食早餐..有六款早餐, 西式同泰式都有, 配兩杯野飲同少量水果, 每朝都食得好飽..
跟住我地去旅行社集合, 搽定防曬, 等齊人就去搭長尾船出發去浮潛! 我地今團只有7個人!
浮潛團大概五個鐘, 包午餐同埋浮潛用具..我地去左Koh Adang附近五個地方浮潛, 啲水好清所以望啲魚好清楚, 船家亦會落埋海幫我地影相!
可惜我地去嘅地方唔遠, 睇到嘅海洋生物種類唔多, 好想下次旺季黎嘅時候去遠啲, 少啲被污染嘅海洋一定更加靚!
返上岸嘅時候我先發現自己腳嘅防曬比海水沖走晒, 對腳已經曬到紅卜卜! 好後悔冇補搽防曬...我而家對腳仲係兩截色><
玩左半日都攰, 所以又返去酒店按摩同訓沙灘椅!
之後我地較岩時間就去Sunset Beach睇日落, 未至於話好驚艷, 但喺沙灘睇日落對香港人黎講係好難得!
之後我地就去食燭光晚餐..揀佢係因為佢係唯一一間提供燭光晚餐而又開門嘅餐廳..
Castaway Restaurant
評分: 味道4 | 環境5 | 價錢3
燭光晚餐套餐得一個, 所以唔使煩, 坐喺特別為你佈置嘅sala上面飲住酒等就得!
個sala喺沙灘上面, 自成一角, 同其他食客有啲距離, 所以可以好好享受二人世界!
二人套餐包埋酒只係需要THB2,200 (~HKD550), 比其他東南亞地方平, 伺應服務都好好, 會主動幫手影相, 亦只會遠距離觀察我地進食嘅速度!
野食味道唔錯, 可惜份量太多, 最後我地兩個都捧住個肚返酒店!
下次會講麗貝島下半部分嘅行程, 包括潛水同瑜伽堂, 請密切留意!
Follow me on facebook for more sharing: Chill Out · Chow Down with Jen
留言列表
